Xornada Día de la Llingua Materna

El Día Internacional de la Llingua Materna, el 21 de Febreiru, cellébrase anualmente en tol mundu pa concienciar sobro la diversidá llingüística del mundu y de cumo ésta alcuéntrase en peligru.

Con eillo, eiquí no País Llionés estamos viendo cumo'l llionés alcuéntrase nuna situación de peligru estremu pola falta de fomentu, la non oficialidá y la falta de reconocimientu de los dreitos llingüísticos  de los sous falantes. Asina, vemos cumo los nuesos dreitos llevan sufriendo muitu tiempu, agora, enclusu, la Xunta de Castiella y Llión y l'Estáu Español están refugando tódalas chamadas d'atención pa que cumpran col Estatutu d'Autonomía de Comunidá Autónoma.

La mesma UNESCO reconoz el dominiu llingüísticu asturllionés en peligru d'estinción y encamenta  la sua conservación.

Por eillo, la vindicación polo llionés anguañu tien que ser fuerti, nun solo cona llingua, sinon tamién en tódolos ámbitos: la despobración, l'avieyamientu, la emigración forciada de la mocedá, la falta de trabayu dinu, el nuesu sistema conceyil, la estración de recursos que nun redunda no País, las nuesas costrumes y tradiciones. Asina vemos cumo todo lo concerniente al País Llionés ye esqueicíu, terxiversá y robáu.

Consideramos que las diferentes llinguas del nuesu País (galego, llionés y castellano) son unas de las meyores ferramientas pa caltener y fomentar el nuesu patrimoniu tanxible e intanxible. Asina podemos dicir que caltener la nuesa llingua faz que conservar la bayura de tódolos territorios muitu más fácil, fomentando una diversidá llingüística que desendolque una mentalidá d'entendimientu y de solidaridá internacional.

Aproveitamos esti día tan importanta pa las cientos de llinguas qu'están na mesma situación qu ela nuesa pa cellebrar una Xornada no día 25 de Febreiru no CSO El Faro onde deprenderemos un pouquín más de la nuesa llingua nun taller d'estami.

Contaremos tamién conas compañeiras asturiadas de Darréu pa que nos cuenten cumo está la situación autual del Asturianu pa depués facer un alderique y siguir deprendiendo e intercambiando esperiencias.

Depuéis vamos facer el recital del I Certame de Poesía Combativa en Llionés conas/os autoras/es. Recordámovos qu'el prazu de presentación d'obras pa esti Certame ye hasta'l día 23 de Febreiru. Podéis unvialas al corréu: ruchar.moceda@gmail.com Las bases alcuéntranse nesti enllaz na nuesa web.

Pa rematar la Xornada habrá una pinchada de música del País. Deixámovos el cartelu onde podéis ver los horarios y tódalas actividades.

Salú!

XORNADA DÍA DE LA LLINGUA MATERNA

25 de Febreiru / CSO El Faro

• 15:00 h. - Comedor veganu.
• 17:00 h. - Taller d'entamu al llionés.
• 19:00 h. - Charra y alderique col coleutivu Darréu sobro la situación del asturianu.
• 21:00 h. - Recital del I Certame de Poesía Combativa en Llionés.
• 21:30 h. - Pinchada de música del País.

Bases Certame Poesía

Certame Poesía

I Certame de Poesía Combativa en Llionés

I Certame de Poesía Combativa en Llionés

Entamamos esti 2017 col I Certame de Poesía Combativa en Llionés. Con esti autu queremos por un lláu siguir calteniendo viva la nuesa llingua y por outru creyar un espaciu alternativu nel que los y las artistas qu'usan el llionés pa espresase puedan coincidir pa poder seguir fomentando l'art y la lliteratura nel nuesu país, amosando a la mocedá las posibilidades que puede ofrecer un idioma cumo'l llionés na sociedá actual.

La presentación de los poemas al certame estará abierta hasta'l 23 de febreiru (cumo puédese ver nas bases). Esti I Certame tendrá cumo remate una Xornada na que los poemas presentaos podrán ser lleíos polos sous autores y autoras, amás de lleer muitas outras obras ya escritas por outros poetas. Sicasí la Xornada tamién tendrá outros autos que xirarán alredor de la llingua llionesa, ya que se realizará la Xornada en bas al Día Internacional de la Llingua Materna. (Sobro esta Xornada ya espublizaremos día, hora, llugar y tódolos detalles necesarios más alantre.)

Esperamos los vuesos poemas. Pondrémonos en contautu con vos al unvialos.

BASES

1. Puede participar cualquier persona a títulu personal.
2. Los poemas han d'estar escritos en llionés: almítese cualquier variedá dialectal del dominiu llingüísticu.
3. La tema ye llibre, entendíu siempres dientru lo que podemos chamar Poesía Combativa, na que tien cabida la denuncia sociopolítica, la memoria histórica, el feminismu, las pasiones de la lluita...
4. La obra tien que ser orixinal, inédita y non galardonada en nengún concursu.
5. Nun hai nenguna estensión mínima nin máxima nos poemas.
6. La presentación de las obras realizarase por corréu electrónicu:
1. Presentarase nun word, pdf ou similar.
2. El prazu de presentación sedrá hasta'l 23 de febreiru de 2017.
3. El corréu al que s'unviarán las obras sedrá: ruchar.moceda@gmail.com
4. Nel asuntu del corréu indicarase: I CERTAME DE POESÍA EN LLIONÉS
5. Nel corréu indicarase el pseudónimu de la autora ou del autor, non el nome real.
7. El xuráu vai formase por militantes de RUCHAR. Los miembros del xuráu nun participarán nel concursu.
8. El resultáu vai dase a conocer de xeitu públicu nun actu.
9. Los poemas publicaranse na web de la organización.
10. Habrá deillos premios pa las tres meyores obras.
11. La presentación al Certame implica l'aceptación de las bases.

Bases del Certame