Dende RUCHAR Mocedá Llionesa, asina cumo dende toda la Esquierda Llionesa, queremos facer públicu’l nuesu apoyu a la manifestación convocada polos sindicatos UGT y CCOO de Llión pal 15 de noviembre na mesma ciudá.
Consideramos que la sociedá llionesa vive anguaño una situación de crisis social, económica y cultural y precisa de la respuesta de la ciudadanía llionesa de xeitu firme y concretu. Sicasí, queremos deixar craro que la nuesa situación nun ye circunstancial, sinon qu’amerita un análisis muito más
fondu y un repartu de
responsabilidades acordias a la realidá que vivimos.
fondu y un repartu de
responsabilidades acordias a la realidá que vivimos.
Hemos falar de la lóxica del capitalismu, con empresas fincadas gracias a la inversión pública que de sutaque deixan na calle a llionesas y llioneses, fuxendo conos sous beneficios na fardela. De las políticas discriminatorias de las administraciones autonómicas y l’Estáu, que durante décadas decidieron de manera voluntaria ignorar las inversiones no País Llionés, poniendo tódalas torgas posibles pal nuesu desenvolvimientu, cumo vien denunciando’l soberanismu llionés durante muitu tiempu. Y por supuestu, de los actores necesarios pa qu’esto sía posible: partidos políticos con nomes y apellidos que nun representoron de nenguna manera a la sociedá que los vota, actuando d’elementu imprescindible. Valga tamién la crítica p’aquellas organizaciones que s’autodenominan d’esquierda y permitieron la existencia d’una Comunidá Autónoma de Castiella y Llión que llevóu a una situación de crisis absoluta a todu’l territoriu llionés, cebándose sobremanera nas suas crases populares, los sous mayores y na xente moza qu’emigra de xeitu obrigáu.
Queremos recordar tamién que nun podemos entender esta reivindicación ensin mentar la grave situación que viven las outras provincias llionesas, Zamora y Salamanca, fondamente vinculadas cona provincia de Llión y conas que compartimos problemática. Aguardamos qu’ellas tamién se llevanten nos próximos meses y todu’l País Llionés escomencipe un procesu de dignificación y defensa del nuesu territoriu.
Ye por ello que convocamos a toda la sociedá llionesa en defensa de los servicios públicos, por una sanidá y educación pa todas y todos de calidá, pola defensa de la nuesa dignidá cumo ciudadanas y ciudadanos, cumo colectivu llionés, acuriosando la nuesa identidá, cultura y llengua; pola defensa de los nuesos puestos de trabayu, la reindustrialización de las comarcas mineras y la lluita escontra la despoblación.
Pol regresu de todas y todos.
